2 patay sa pagkahulog sa mixer truck

5 Aug, 2021, No comments

By Steph Berganio

DEAD on arrival sa balay tambalan ang driver ug kauban niini dihang mga alas 7:00 sa buntag adlawng Miyerkules, Agusto 4, 2021 nahulog ang usa ka Mixer truck diha sa pangpangon nga bahin sa Sayre Highway, Zone-1, Barangay Maluko, lungsod sa Manolo Fortich, Bukidnon.

Giila ang driver nga mao si Arnold Ido, 40 anyos, minyo, taga Mat-I, lungsod sa Claveria, Misamis Oriental kinsa maoy nagmaneho sa Chenglong Mixer Truck sa St. Joseph Enterprise nga rehistradosa pangalan ni John P. Cabañog sa Villa Ernesto, Gusa, Cagayan De Oro City.

Lakip sa nakalas ang kinabuhi mao ang iyang kauban nga si Donald Pialan, 30, ulitawo taga Sumalsag, Malitbog Bukidnon.

Sa inisyal nga imbestigasyon sa Manolo Fortich Police Station ang mixer gikan sa Nasalaban lungsod sa Tagoloan ug paingon unta sa Biogreen sa Kisolon, Sumilao Bukidnon kon hain puno kini og ready mix concrete.

Apan pagdangat sa subidahon nga bahin nidahili ang ligid gumikan sa kadanlog hatod sa kusog nga ulan maoy hinungdan nahulog kini sa pangpang ug nabalitok.

Ang Manolo Fortich RQ Rescue Team, Barangay Maluko Rescue Team, M. Monstesclaros Enterprise, Inc. PNP Manolo Fortich , Bureau of Fire (BFP) Manolo ug Engineer Support Company, 52nd Engineer Brigade sa Philippine Army maoy nagpahigayon og rescue operation sa pagkahulog sa mixer.

Tulo ka oras kapin ang nilabay mga alas 10:30 sa buntag gikan sa pagkahulog niini usa pa nakuha ang lawas sa driver samtang mga alas 2:30 sa hapon nakuha sab dayon ang lawas sa kauban niini nga naipit sa ilawom sa mixer.

Gisuwayan pa og dala ang mga biktima sa Bukidnon Provincial Hospital Annex sa Brgy. San Miguel, Manolo Fortich Bukidnon apan gideklarar nga dead on arrival sa attending physician nga mao si Dr. Ava Mae Ortega.

Padayon pa ang imbestigasyon sa kapulisan karon panahona samtang miabiso sa mga motorista nga ning gakasinati ang mga pag-ulan magbinantayon diha sa pagmaneho sa kadalanan.

photo courtesy: 52nd Engr. Brigade-PA

Katawhan giabisohan ni Governor Emano batok sa bag-ong pagpangilad gamit iyang pangalan

5 Aug, 2021, No comments

TALIWALA sa iyang limpyo ug transparensya nga track record sa pulitika, padayon nga gigagamit sa dautang mga tao ang pangalan ni Gobernador Bambi Emano sa pagpangilad sa katawhan aron dauton lamang ug ang iyang dungog.

Ning bag-o lang, adunay nikalat nga text message nga nagpahibalo sa publiko nga anaay ipanghatag nga kwarta ang Gobernador apan pagklaro sa kagamhanan sa lalawigan nga wala kini kamatouran. Ang text message mao kini: "Good Day Maam/Sir I'm CHERRY T. CASTRO from EMANO FOUNDATION. Inform lang ko maam/sir nga isa ka sa WOMEN'S IN POWER or SENIOR CITIZEN nga maka dawat ug Cash Asistant gikan sa atong halangdon na GOVERNOR, BAMBI EMANO. palihog ko present ani nga txt message sa inyo CLASTER HEAD para ma apil mo sa Master list. Ug ang claster head na ninyo ang mag explain sa pamaagi ani nga Ayuda. DAGHAN SALAMAT!."

Panawagan ni Governor Bambi sa katawhan nga dili tinuod ug bakak ang tanang sulod sa maong text mensahe ug posibleng gikan kini sa iyang mga kaatbang sa pulitika nga kaniadto pa pulos pagpangdaot lamang ang tumong.

Pipila na ka higayon nga gidaot ug gigamit sa black propaganda ang pangalan sa Gobernador, apan gisaway ug maayo niini ang mga pagbutang-butang ug pagpangilad karon higayuna nga anaa pa taliwala sa pandemya ug labing nanginahanglan ug ayudang pinansyal ang kadaghanan, apan gigamit pa gihapon kini na higayon aron sa pamulitika sa mga dautan nga tao nga usa ang tumong mao lamang ang pagpukan kaniya.

Dugang sa Gobernador nga undangon na ang pagpakalat sa mga walay hinungdan ug basihan nga text message kay ang labing ma-apektuhan sa maong buhat mao ang katawhan nga iyang gikahadlokan nga mawad-an unya og pagsalig sa gobyerno.

Source: Misamis Oriental Provincial Information Office

Emano gipasalamatan ang kwerpo sa kapulisan

5 Aug, 2021, No comments

UNDANON ug kinasing-kasing ang mensahe ug pasalamat nga gihatag ni Gobernador Bambi Emano atol sa ika 26th Police Community Relations Month Culmination Ceremony sa Misamis Oriental Police Provincial Office (MOPPO) kon asa nahimo kining Guest of Honor ug Speaker sa dakong kalihokan sa kapulisan.

Sa temang “Pulisya at Pamayanan, BARANGAYanihan sa Hamon ng Pandemya at Laban sa Krimen” nahimong mauswagon ug mabulukon ang gipahigayon nga seremonya.

Sa pagsugod ni Governor Bambi Emano sa iyang katundanan isip amahan sa lalawigan, iyang gihingusgan ang importansya sa Turismo sa probinsya ug kini nahimo niyang Flagship Program inubanan sa iyang walo ka mga haligi nga nagtuko niini nga gilangkoban sa Environment, Peace and Order, Cooperative, Transportation, Infrastructure, Agriculture, Health ug Education.

Matod ni Gobernador Bambi, dako ang nahimong kabag-ohan sa lalawigan kon hisgutan ang kahimtang sa turismo.

“I persevered, I moved forward, because I believe that it is a dream for Misamis Oriental to develop the two hot springs, the two white islands, and the more than 70 waterfalls that we have.”

Nagpasalamat usab si Governor Bambi sa mga mayores sa lalawigan nga katimbayayong niya sa pagpalambo sa turismo sa lalawigan.

“And for 2,946 days, would like to thank mayors like Mayor Erick, al the mayors for working with me for tourism and now, wherever you go, bisan asa mo paingon nga munisipyo kaniadto walay mabisitahan, walay maadtoan karon, naa nay mga tourist spots.”

Sa iyang mensahe usab, gihatagan ug gimbug-aton ni Governor Bambi Emano ang presensya sa mga kapulisan kon diin sila nahimong usa ka dakong parte sa pagminitar sa kahusay ug kalinaw sa lalawigan.

“But with all the dreams that I had, there is actually one factor that was really able to help us why we are now developed, why we are where we are right now, kabalo mo unsa na nga factor? Because you were able to help us maintain peace and order in the Province of Misamis Oriental.”

Dili gayud malalis nga tungod makanunayong pagtinabanga sa Panggamhanang Probinsyal sa Misamis Oriental ug pwersa sa kapulisan, ug mga lideres sa kalungsoran dako na ang nahimong kabag-ohan sa probinsya kon hisgutan ang kahapsay ug kalinaw ug labaw sa tanan ang turismo nga maoy naghatag og maayong panginabuhi sa katawhan sa lalawigan.

Source: MisOr PIO

Suporta sa MisOr gipasalamatan ni Chella Falconer

5 Aug, 2021, No comments

KARON pa lamang mapasalamaton na og dako ang 21 anyos nga si Chella Grace Falconer sa suporta nga iyang nadawat gikan panggamhanan sa lalawigan sa Misamis Oriental alang sa iyang pagsangka sa Miss Universe Philippines 2021 isip representante sa lalawigan.

Sa live sesión ni Chella sa usa ka local pageant site, gipasalamatan niini si Governor Bambi Emano uban ni Atty. Jeffrey Saclot ug ang tibuok Misamis Oriental sa suporta nga nadawat niini.

“They are so supportive of me, I cannot even fathom how much they have supported me throughout this journey, thank you, Gov. Bambi, to Atty. Jeff and to the whole Misamis Oriental, my heart goes to you.”- pagpasalamat ni Chella Grace Falconer.

Si Chella nahimong mananaog sa Miss Kuyamis 2019 ug misalmot sab kini sa Miss Bikini Philippines 2020 diin siya nahimong 1st runner-up.

Niining padayun ang online challenges sa MUPh 2021 nga maoy basehan sa pagpili sa final candidates sa maong pageant nanginahanglan ang pambato sa lalawigan og suporta pinaagi sa pag-boto kaniya sa MUPh app.

Mismong si Gobernador Bambi nihangyo sa Misamisnon nga suportahan ang bisan kining representante nga modala og pangalan sa lalawigan kay ang ilang kalampusan dako sab nga kalamposan sa lalawigan nga maila sa kadaghanan.

Source: MisOr PIO

PDLs sa MOPJ ug City Jail nabakunahan na

4 Aug, 2021, No comments

By Steph Berganio

Sukad sa pagbuto sa pandemya nga Covid-19 nagtala lamang ug duha ka kaso sa nataptan sa virus ang Misamis Oriental Provincial Jail and Rehabilitation Facility nagpamatoud sa epektibo nga mga lakang nga gihimo sulod sa pasilidad.

Karon panahona mas hingpit silang giprotrektahan ni Misamis Oriental Governor Bambi Emano human niadtong adlawng Lunes, Agosto 2, 2021 ubos sa A2 ug A3 levels nga prioritization framework nga gilangkoban sa mga Senior Citizens ug mga dunay comorbidities o gipangbati sa panlawas gilakip ang mga piniriso kon diin ilang nadawat ang Janssen sa Johnson and Johnsons vaccines.

Butang nga gikalipay sab sa mga persons deprived of liberty nga sila aduna nay proteksyun sa makapatay nga virus sulod sa prisuhan.

Lakip sa mga lakang nga ilang gihimo sukad pagbuto sa pandemya mao ang pagpahigayon og E-dalaw kon diin ipaagi na diha sa online ang pagbisita sa ilang mga mahal sa kinabuhi samtang online usab ang pagpahigayon sa pagdungog sa kaso.

Sa Cagayan de Oro Lumbia City Jail moabot na usab sa Kapin 1,000 ka PDL ang nabakunahan pinaagi sa mobile vaccination team sa LGU-CDO ug Department of Health Region 10.

Adlawng Martes Agosto 3 mokabat 619 ang nabakunahan hinungdan miabot sa 1,007 ka mga PDLs ang nakabenepisyo sa vaccine rollout sa siyudad.

Gumikan kay ang prisuhan gikonsidera nga 'enclosed spaces' adunay taas nga risgo sa pagtinakdanay sa virus hinungdan gihingusgan kini nga programa alang sa proteksyon sa mga PDLs.

photo courtesy PIO

Espesyal Ayuda madawat na sa mga apektado sa ECQ karon semanaha

3 Aug, 2021, No comments

by Steph Berganio

Ang Buhatan sa Department of Social Welfare and Development (DSWD) Field Office X nagpinirmaha og Memorandum of Agreement uban ang duha ka mga lokal nga kagamhanan nga gipaubos sa Enhanced Community Quarantine (ECQ) kini alang sa implementasyon sa special ayuda gikan ni Presidente Rodrigo Duterte.

Tumong sa MOA aron maayo ang dagan ug distribusyon relief assistance ngadto sa mga residente sa Cagayan de Oro City ug Gingoog City, Misamis Oriental. Ang DSWD motransfer og pundo ugmang adlawa ngadto sa duha ka siyudad samtang ang pagpang-apod og family food packs magpadayon.

Basi sa Joint Memorandum Circular 2 series of 2021, Ang national government mohatag og financial assistance nga P1,000 matag indibidwal ug moabot sa P4,000 matag pamilya nga apektado sa ECQ sa Northern Mindanao.

Ang DSWD Field Office X nangayo sab og suporta gikan sa laing national government agencies aron happy ug paspas ang implementasyon sa ECQ special ayuda. Katambayayong sa buhatan ang Department of the Interior and Local Government nga girepresentahan ni Regional Director Arnel Agabe, 4th Infantry Division of the Philippine Army Commander Major General Romeo Brawner Jr nga girepresentahan ni Colonel Michelle B. Anayron Jr., ug Police Regional Office X Director Police Brigadier General Rolando Anduyan nga lakip nipasalig sa ilang suporta.

Una na nga giaprobahan ni Presidente Rodrigo Duterte ang P22.9 Billion alang sa ECQ areas, lakip ang duha ka siyudad sa Northern Mindanao.

Basi sa profiled list sa beneficiaries ang Cagayan de Oro City adunay 191,956 ka family beneficiaries samtang ang Gingoog City dunay 53,000 families.

Moabot sab sa 49,344 ka family food packs gikan sa DSWD ang gihatag sa Cagayan de Oro City ug Gingoog City. Ning bag-o lang ang Gingoog City nakadawat og 10,000 ka food packs gikan sa National Resource and Logistics Management Bureau (NRLMB) sa DSWD Central Office samtang susamang ihap sa Cagayan de Oro City gikan sa DSWD Field Office X.

Photo Courtesy DSWD-X

Mga proseso sa paghatag sa DSWD family food packs

30 Jul, 2021, No comments

Ang Department of Social Welfare and Development kon DSWD mao ang nakatuka sa paghatag ug dugang nga suporta, serbisyo ug ayuda ngadto sa mga kagamhanang lokal kon Local Government Units (LGUs) nga nanginahanglan panahon sa kalamidad, kalisod, ug emerhensiya.

Ang Local Social Welfare and Development Offices kon LSWDOs sa kada LGU maoy muila sa mga komunidad nga nanginahanglan ug tabang o ayuda (food packs/non-food items) ug mao usab ang mu koordinar ngadto sa DSWD.

Ang tanan nga mga LGUs ug uban pa nga mga civil organizations maka request ug relief goods gikan sa DSWD kung adunay opisyal nga sulat nga nag request sa maong mga food and non-food items.

Ang DSWD muhatag lamang ug mga relief goods ngadto sa LGUs o lain pang mga organisayon nga nag-request ug naka comply sa tanan nga mga rekisitos niini.

Ang mga relief goods itunol ngadto sa mga LGUs o sa mga organisasyon nga nag request niini ug sila na dayon ang adunay diskresyon kung kanus-a ug kang kinsa nila kini ipang apod-apod. Apan dugang pa, kung kinsa lamang ang nakalista nga makadawat sigon sa request sa matag LGUs maoy i-prioritize kon unahon sa paghatag.

Ang maong mga relief goods, sa ayha pa kini ipang apod-apod ginasiguro nga anaa sa maayo nga kondisyon ug kahimtang ug protektado batok sa physical o chemical damage. Kung ugaling adunay deperensya sa mga nadawat nga ayuda palihog lang ug pahibalo sa ahensya nga naghatag niini para gilayon ma aksyonan diritso.

Dili tanan nga mga relief goods nag gikan sa DSWD tungod kay aduna usab mga ayuda nga gikan sa mismong Local Government Units (LGUs), Barangay Officers, Civil Society Organizations (CSOs), Non-Governmental Organizations (NGOs) ug uban pang mga National Government Agencies (NGAs) apan ang timailhan sa DSWD nga mga ayuda nakasulod kini sa kahon nga adunay lista sa sulod niini ug adunay DSWD nga logo.

Ang DSWD Field Office X kanunay nga andam sa paghatag ug dekalidad nga serbisyo ug pagtabang sa mga nanginahanglan hilabina sa mga dili matagna nga panahon ug panghitabo.

Dugang pa, mapasalamaton ang ahensiya sa mga LGUs nga makanunayong nakigtambayayong alang sa kalambuan sa matag lumulupyo sa rehiyon.

Source: DSWD-10

Modernong city jail sa Marawi buksan karong Nobyembre

28 Jul, 2021, No comments

MARAWI CITY, Lanao del Sur (PIA)—Usa ka moderno nga city jail ang gitakdang buksan dinhi sa dili madugay.

Sa usa ka interbyu, gipahayag ni Secretary Eduardo Del Rosario sa Department of Human Settlements and Urban Development (DHSUD) ug Task Force Bangon Marawi (TFBM) chairperson nga ang bilanggo-an sa syudad gikatakda nga mahuman sa Nobyembre 15, niining tuig.

"Napakaganda ng ipinapagawang Marawi City Jail. Ito ang pinakamalaki at pinaka-moderno sa buong BARMM. (Ang Marawi City Jail nga gitukod nindot kaayo. Kini ang pinakadako ug labing moderno sa tibuuk nga BARMM)," ingon niya.

Matud pa ni Del Rosario nga ang pasilidad mahimo’ng puy-an sa dili mo-ubos sa 1,000 ka mga piniriso ug mahimo usab nga maka-akomodar sa mga piniriso nga gitawag nga 'high-risk personalities.'

Dugang pa niya nga magsilbi usab kini nga Rehabilitation Center sa tanan nga mga piniriso alang sa pagpahigayon sa Comprehensive Livelihood, Technical Development ug Recreational Activities aron mag-host sa lain-laing mga dula lakip na ang basketball, volleyball, ug uban pa.

Gipahayag ni Del Rosario nga ang moderno nga bilanggo-an mag-alagad sa mga dinakpan gikan sa syudad apan tungod sa kadak-on sa kapasidad niini, ang Bangsamoro Autonomous Region in Muslim Mindanao (BARMM) mahimo usab nga makig-koordinar aron ang mga piniriso gikan sa mga probinsya mahimo usab nga ma-serbisyohan.

"Kini nga proyekto alang sa Marawi City, apan ang BARMM mahimong makig-koordinar sa uban pang probinsya kay kini sobra pa man gani sa gidaghanon nga 1,000 nga mga piniriso," dugang ni Del Rosario.

Karon naa sa ‘63% completion’ ang pagtukod sa prisohan ug padayon ang construction hangtud nga kini hingpit nga mahuman karong umaabot bulan sa Nobyembre. (BGE/PIA-10/PIA ICIC)

Ang Marawi City Jail gitakda nga buksan karong umaabot bulan sa Nobyembre. Kini ang pinakadako ug pinaka-moderno nga prisohan sa tibuok rehiyon sa BARMM. (BGE/PIA-ICIC)

Nasunogan sa Lanao del Norte gihatdan og family food packs sa DSWD

27 Jul, 2021, No comments

Mikabat na ngadto sa 1,691 ka residente sa Baroy, Lanao del Norte ang gihatagan og family food packs ug pinansyal nga ayuda sa Department of Social Welfare and Development (DSWD) Field Office X.

Ang mga gitabangan gilangkuban sa mga mag-uuma, mangingisda, drayber, nasunogan, ug gagmay'ng negosyante sa nasangpit nga lungsod.

Kini nga kalihukan mao ang tubag sa hangyo sa lokal nga pangagamhanan sa Baroy nga matabangan ang mga sakop sa nagkalain-laing hut-ong sa katilingban nga labing naapektohan sa krisis karong panahona.

Gawas niana, mutunol usab og hinabang ang DSWD Field Office X sa laing 3,466 ka residente sa nagkalain-laing dapit sa Lanao del Norte sulod karong semana.

Gihatagan sila og food packs. Matag kahon sa food packs adunay sulod nga upat ka tuna flakes, duha ka sardinas, upat ka corned beef, lima ka sachet nga instant coffee, lima ka sachet sa powdered cereal drink, ug unom ka kilo nga bugas.

Gibana-bana nga makapa-igo sa pamilya nga adunay lima ngadto sa unom ka sakop sulod sa duha ngadto sa tulo ka adlaw ang matag kahon.

Ang DSWD padayon ug kanunay nga andam sa pag-alagad ngadto sa mga nanginahanglang sektor sa tibuok Northern Mindanao sama niining pandemiya nga nasinati karon.

Source: DSWD-10

Cash assistance aprobado ni Presidente nga ihatag na sa matag pamilyang apektado sa ECQ

25 Jul, 2021, 2 comments

By DSWD-10

Ang mga indibidwal ug pamilya nga apektado sa localized lockdowns sa Northern Mindanao gikatakda nga makadawat og hinabang gikan sa Department of Social Welfare and Development (DSWD) human gilagdaan sa ahensiya kauban ang Department of the Interior and Local Government, ug ang Department of National Defense ang implementing guidelines niadtong Hulyo 25 nga maghatag og hinabang pinansiyal sa mga lokalidad nga gipailawom sa Enhanced Community Quarantine (ECQ).

Sa Joint Memorandum Circular No. 2, Series of 2021, ang pagbana-bana nga kapin sa usa ka milyon nga apektado nga mga indibidwal ug pamilya sa dakbayan sa Cagayan de Oro ug Gingoog City sa Misamis Oriental, makadawat og P1,000 cash ang matag sakop sa pamilya, apan dili kini molapas sa P4,000 ang itunol sa matag pamilya pinaagi sa Assistance to Individuals in Crisis Situation (AICS) sa DSWD.

Sumala sa guidelines, ang mga prayoridad nga target nga benepisyaryo sa espesyal nga AICS mao kadtong apektado nga mga indibidwal ug pamilya nga nadislokar ang ekonomikanhong kalihukan gumikan sa pagdeklara sa usa ka localized ECQ sa ilang lugar.

Ang target nga mga benepisyaryo mahimong maglakip sa mga pamilya nga kaniadto nakadawat sa Social Amelioration Program (SAP) ilawom sa Bayanihan 1 ug dugang nga mga benepisyaryo sa emergency subsidy ilawom sa Bayanihan 2; mga indibidwal nga nahisakop sa mga vulnerable groups sama sa mga indibidwal nga nagpuyo nga nag-inusara, mga senior citizen o mga Persons with Disability (PWD); ug uban pa nga na-stranded tungod sa trabaho nga anaa sa lugar nga gipa-ubos sa ECQ.

Gihatagan og gibug-aton sa JMC nga ang target nga mga benepisyaryo, sa oras sa pagdeklara sa ECQ, kinahanglan nga nagpuyo sa pisikal, temporaryo man o permanente, o kinsa naa pa sa mga lugar nga gipailalom sa ECQ.

Samtang, isip kabahin sa teknikal nga hinabang niini, ihatag sa DSWD ngadto sa mga local government unit (LGUs) ang lista sa mga benepisyaryo sa SAP nga magsilbing basihanan alang sa mga LGUs sa pag-ila sa final list sa mga benepisyaryo nga mahatagan og tabang sa ilang tagsa-tagsa nga lugar. .

Ubos sa JMC, giawhag ang mga LGUs nga i-post sa ilang opisyal nga mga website, mga account sa social media, ug sa mga makita nga lugar sa mga hingtungdan nga barangay ang lista sa mga naaprobahan nga beneficiaries, sa wala pa ang aktwal nga pagpanghatag.

Gipaabot nga ihatag sa mga LGU ang hinabang pinansiyal sa mga beneficiary sulod sa 15 ka adlaw gikan sa ilang pagdawat sa mga pundo nga ibalhin sa DSWD.

Dugang niini, sumala sa JMC, ang mga LGU maghimo sa ilang kaugalingon nga Grievance and Appeals Committee aron makadawat ug mahatagan solusyon ang mga reklamo.

Usa ka Joint Monitoring and Inspection Committee himuon usab aron maghatag teknikal nga tabang sa mga hingtungdan nga LGUs ug aron mabantayan ang ilang pagsunod sa mga probisyon sa JMC ug sa guidelines sa espesyal nga hinabang ilalom sa AICS sa DSWD.

Ang pundo alang sa nasangpit nga hinabang gikan sa Office of the President. Inisyatiba kini mismo ni Presidente Duterte nga maghatag ayuda pinansyal alang sa mga apektadong pamilya sa ilalom sa ECQ areas.

Sa katapusan, ang pagpanghatag og hinabang usa ka dugang nga tabang sa ihatag nga Family Food Packs aron makatabang nga mapagaan ang socio-economic effects sa pandemya, labi na ang mga Pilipino nga nagpuyo sa mga lugar nga sakop sa ECQ.|DSWD-10

(File photo PRRD)

Family food packs gikan DSWD-10 miabot na ug gidawat sa Gingoog City

22 Jul, 2021, 2 comments

Gidawat na sa lokal nga pangagamhanan sa Gingoog City ang 15,000 ka mga family food packs gikan sa DSWD.

Sa maong ihap, 5,000 ang gikan sa DSWD Field Office 10 samtang laing 10,000 gikan sa DSWD Field Office 11.

Ang paghatod sa family food packs maoy tubag sa hangyo ni Mayor Erick Cañosa aron mahatagan og ayuda ang mga pamilya nga labing naapektuhansa pagpailalom sa syudad sa Enhanced Community Quarantine (ECQ).

Matag kahon sa food packs adunay sulod nga upat ka tuna flakes, duha ka sardinas, upat ka corned beef, lima ka sachet nga instant coffee, lima ka sachet sa powdered cereal drink, ug unom ka kilo nga bugas.

Nagpadali ang paghatod sa hinabang tungod sa pakigtambayayongay sa tali sa DSWD Field Offices, mga nasudnong ahensiya sa gobyerno ug mga lokal nga pangagamhanan.

Dugang pa, mipadayag si Mayor Cañosa sa iyang pagpasalamat sa DSWD tungod sa paspas nga tubag ug aksyon niini sa iyang hangyo nga ayuda.

Ang DSWD magpadayon sa pagtambayayong sa mga apektado nga lokalidad aron masiguro nga mahatagan ang tanang nga naapektuhan sa pandemya.| DSWD 10

Mobile Number Portability (MNP) Act hingpit nga ipatuman sa Globe, Dito ug Smart

22 Jul, 2021, No comments

By Steph Berganio

Sugod sa bulan sa Septiyembre mahimo na nga magbalhin og network sama Globe, Dito, ug Smart ang katawhan nga dili kinahanglan mag-usab sa ilang orihinal nga mga mobile number.

Maayong balita alang sa mga mobile phone users kay mahimo na nga mag switch og networks nga dili maapektohan ug kinahanglan mag-usab sa ilang phone numbers.

Kini samtang ilang usabon ilang subscription gikan sa postpaid ngadto prepaid o prepaid to postpaid nga magsugod sa fourth quarter sa 2021.

Nasabutan kini human ang tulo ka mga major telecommunications players sa nasud nga mao ang GLOBE, SMART ug DITO nagkauyon nga ilusad ang mobile number portability services.

Pinaagi sa Telecommunications Connectivity Inc. (TCI) nga mao ang kompanya nga giporma sa Globe Telecom, Smart Communications ug Dito Telecommunity nga naglayon aron implementar ang Mobile Number Portability (MNP) Act ang magsugod sa bulan sa Septiyembre 30, 2021.

"Aside from encouraging healthier competitions among the players, the MNP also grants Filipinos the freedom to switch to their preferred mobile service provider seamlessly and conveniently," matud ni Atty. Adel Tamano, ang Treasurer sa TCI ug Chief administrative officer sa Dito Telecommunity.

DSWD 10 misiguro sa ayuda sa apektado sa ECQ

21 Jul, 2021, No comments

GISIGURO sa buhatan sa Department of Social Welfare and Development (DSWD) Region 10 nga matagaan og food assistance ang mga lugar nga apektado sa Enhanced Community Quarantine sama sa siyudad sa Gingoog ug siyudad sa Cagayan de Oro.

Padayon ang ilang pag monitor sa mga lugar aron masiguro nga makadawat ang mga apektadong pamilya. Si DSWD Field Office X Regional Director Mari-Flor A. Dollaga ang nakigkita na ni Cagayan de Oro Mayor Oscar Moreno ug Gingoog City Mayor Erick Cañosa aron masugdan na ang distribution sa mga family food packs ug uban pa nga mga posibleng pagpanghatag og mga pagkaon lakip ang mga non-food item.

Sa kinatibuk-an ang Gingoog City makadawat og 15,000 ka mga family food packs kon diin 10,000 ang gikan sa DSWD Field Office 11 ug 5,000 gikan sa DSWD Field Office 10. Gihulat pa usab sa DSWD ang listahan sa pamilya alang sa relief assistance sa Cagayan de Oro niining padayon pa ang ilang pagpahigayon og family data profiling.

Ang duha ka mga local nga panggamhanan ang padayon nakigkoordinar sa buhatan ug laing mga ahensya alang sa dugang pang tabang sa mga apektadong pamilya.

Giabisuhan usab sa buhatan ang duha ka mga LGUs nga sutaon ang ihap sa mga apektado aron masiguro kon sila kwalipikado ba nga makadawat og Assistance to Individuals in Crisis Situation (AICS) nga programa sa ahensya nga maghatag og assistance nga gipaagi sa cash.

Si Cagayan de Oro Mayor Oscar Moreno namahayag kaganina sa Daily Press Briefing nga aduna na siyay gimando sa CSWD ug gipasabot niini nga nagpasalig sab og ayuda ang national nga kagamhanan.

3 ka mga lalaki sa Bukidnon dakpan sa kasong pagpanglugos

21 Jul, 2021, No comments

By Steph Berganio

Tulo ka mga lalaki sa managlahing dapit sa Bukidnon ang sikop gumikan sa kasong pagpanglugos niadtong Hulyo 17, 2021.

Unang dinakpan mao ang ang usa ka construction worker nga giilang si Carlito Guinontao, 49 taga Brgy. Santiago Manolo Fortich Bukidnon.

Sikop kini pinaagi sa gisilbi nga warrant of Arrest sa kapulisan sa Manolo Fortich Bukidnon.

Dakpan usab ang gikonsiderang Top 10 most wanted person sa Municipal Level sa Lantapan nga mao si John Anthony Besahan didto sa Sitio New Ilocos, Barangay Dalwangan, Malaybalay City, Bukidnon.

Walay piyansa nga girekomendar ang korte sa kasong pagpanglugos nga giatubang niini.
Si Besahan nasikop sa mga operatiba sa Lantapan Police Station sa pagpanguna ni Police Major Jerry Paronia ug Bukidnon Provincial Mobile Force Company.

Samtang hulog sa kamot sa kapulisan ang mag-uuma nga mao si Joy Elito Villamor taga Barangay Cabadiangan Kadingilan Bukidnon dihang gikasa ang operasyon sa hiniusang pwersa sa Kadingilan Municipal Police Station sa pagpanguna ni Police Captain Dino Cuevas uban ang Dangcagan MPS, 1003rd Maneuver Company ug RMFB10.

Kasong pagpanglugos gihapon ang giatubang sa suspek nga walay piyansa nga girekomendar ang korte.

Photos Buk PPO

400,000 doses sa covid 19 vaccines miabot sa NorthMin

20 Jul, 2021, No comments

By Steph Berganio

MOKABAT 400, 000 doses sa Covid-19 vaccines ang miabot sa Laguindingan Airport kaganina alas 4:00 sa hapon alang sa Northern Mindanao.

Gikumpirma ni CdeO Mayor Oscar Moreno nga Lakip sa mga bakuna nga midangat mao ang Johnsons and Johnson, Aztrazeneca ug uban pa.

Dugang niini nga lakip sa priority nga mabakunahan ang persons deprived with liberty (PDL) ug kadtong mga Senior Citizen nga anaa nanimuyo sa mga bukid nga bahin.

Human gimando nga ipaubos sa Enhanced Community Quarantine ang Cagayan de Oro City ug Gingoog City gumikan nadetektar ang kaso sa DELTA variant.

Mianhi gilayon sa siyudad ang Coordinated Operations to Defeat Epidemic (CODE) Team, nga gilangkoban nila ni NTF Against COVID-19 Chief Implementer Sec. Carlito Galvez, NTF Against COVID-19 Chairperson Sec. Delfin Lorenzana, IATF Chairperson Sec. Francisco Duque III, ug NTF Against COVID-19 Vice-Chairperson Sec. Eduaro Año

Kon diin ilang gi meeting si Cagayan de Oro City Mayor Oscar Moreno ug Gingoog City Mayor Erick Cañosa aron pagsuta ug ma monitor ang implementation sa ECQ sa duha ka siyudad.

Gipasalig sa Code team nga paspasan ug prayoridad sa vaccines ang Cagayan de Oro ug Gingoog nga gikinahanglan makuha ang 2,000 doses matag adlaw.

Usa sa testing, tracing, isolating ug labaw sa tanan ang paspas nga pagbakuna nga kung mahimo kadtong mga anaa na sa priority list ang ibalay-balay na gyud.

Boosting the COVID-19 Vaccination Program in the region, DOH-10 receives 25,660 doses of Johnson & Johnson’s single-shot coronavirus vaccine, July 19.| PIA-10

CdeO-MisOr bet Cindy Obeñita gikoronahang Bb. Pilipinas Intercontinental 2021

13 Jul, 2021, 1 comment

By Steph Berganio

GARBO ug honor sa Cagayan de Oro ug Misamis Oriental ang dala ni Miss Cagayan de Oro Cinderella Faye Obeñita dihang gideklarar kining Binibining Pilipinas Intercontinental 2021 kagabii sa coronation night sa usa ka prestihiyosong kompetisyon sa beauty pageant nga mao ang Binibining Pilipinas.

Dihang gitawag ang top 12 semi finalist wala nalakip ang pangalan ni Cindy apan gumikan kay number 1 kini sa voting o people’s choice ika number 13 kini og lakip sa nahimong finalist.

Wala usab nadawat nga laing minor ug major awards si Cindy apan daghan ang nakurat, naka wow ug labihan ang pagdayeg kaniya dihang gikaon niini ang mikropono sa iyang tubag sa final question and answer sa gikan sa sikat nga Filipino designer nga mao si Michael Cinco.

"How important are luxury items like bags, clothes, and jewelry for a woman, when the national economy is down and struggling?"

"In life, we always find ourselves in a crossroad of choices. Women always have a choice—whether to prioritize luxury items while we are facing a pandemic, and also we have a choice to embrace the concept of a new beautiful, which is responsive to the needs of the time, adaptive to the change of times. I think I would choose to be that woman who understands the problems of the Philippines, the problems of my community, so that we would be able to uplift each other. I would be that kind of woman, who would comfort the afflicted and afflict the comfortable."

Gumikan sa iyang dere-deretso nga tubag mismong si Miss Universe Catriona Gray nakasulti og ‘very well said,” samtang nagtrending sa Philippine twitter ang iyang pangalan nga Cinderella kon diin ang mga tweets nagpaabot gihapon og pagdayeg tungod sa kalantip sa salabutan sa pagtubag sa pangutana.

Ang kagamhanan sa probinsya sa Misamis Oriental sa pagpanguna ni Governor Bambi Emano ug Provincial Tourism Head Atty Jeffrey Saclot nga maoy dako ang gihatag nga suporta sa pambato sa lalawigan labihan ang kalipay sa dakong dungog nga gihatag ni Cindy.

Photo Bb. Pilipinas Official Facebook Page

Groundbreaking sa P400M water supply sa Marawi gipangunahan sa BARMM, PLGU-LDS

13 Jul, 2021, No comments

MARAWI CITY, Lanao del Sur (PIA)—Gipangunahan sa Bangsamoro government ug provincial government sa Lanao del Sur ang groundbreaking ceremony sa usa ka P400 milyon water supply expansion ug rehabilitation project sa Marawi.

Isip simbolo sa pagsugod ug pagtukod sa proyekto sa Barangay Gadongan, nanguna sa ‘ground-breaking ceremony’ si Lawyer Naguib Sinarimbo Ministro sa Interior and Local Government, Provincial Governor Mamintal Alonto-Adiong Jr, ug Marawi Mayor Majul Gandamra.

Tumong sa proyekto nga mahatagan ug limpyong mainom ang mga residente sa 40 ka mga barangay sa syudad lakip ang Mindanao State University, Bless Area, ug ang Pugaan area.

Nakumpleto niini ang rehabilitasyong proyekto sa Task Force Bangon Marawi (TFBM), usa ka katumanan sa pasalig ni Punong Ministro Al Haj Murad Ebrahim nga gipahayag sa iyang 12-Point Agenda nga ang rehabilitasyon sa Marawi usa ka prayoridad.

"This demonstrates the continuing commitment of the Bangsamoro Government to respond to the needs of our communities and partners with willing and able LGUs in the region. (Kini nagpamatuod nga gituman sa Gobyerno sa Bangsamoro ang pasalig nga tubagon ang mga panginahanglanon sa among mga komunidad kauban ang LGU nga andam motabang)," matud pa ni Sinarimbo nga maoy nagrepresentar sa Punong Ministro atol sa seremonya.

Ang proyekto idumala sa kagamhanang probinsyal sa Lanao del Sur.

"The water supply in Marawi City has always been a perennial problem. We have always requested solutions to this. Thankfully, the Bangsamoro government has approved our request. (Ang suplay sa tubig sa Marawi City usa ka kanunay nga problema. Kanunay kaming naghangyo nga solusyonan kini. Salamat, gi-aprobahan sa gobyerno sa Bangsamoro ang among hangyo)," matud ni Governor Adiong.

Gitunol usab atol sa seremonya ang tseke nga mikabat sa 50 porsyento sa ‘project cost’ aron masugdan ang pagpatuman sa proyekto. (BGE/PIA-ICIC)

4ID: “Rest assured na as a soldier ay meron talagang matatanggap na benepisyo.”

10 Jul, 2021, No comments

By Steph Berganio

Gidala na sa ilang tagsa tagsa ka mga pamilya ngadto sa ilang nagkadaiyang lugar kaganina sa buntag ang unom ka mga patayng lawas sa sundalo nga midangat dinhi sa Cagayan de Oro kagahapong adlawa.

Gihaya pa kini ug g-ivigilan og usa ka gabii sulod sa 4ID gymnasium sa Camp Evangelista Patag Cagayan de Oro ug sayo sa buntag Hulyo 8, 2021 gihatagan og pag-ampo ug katapusang military honor usa gihatod sa ilang tagsa-tagsa ka lugar sa Misamis Oriental, Bukidnon ug Agusan del Norte.

Gipasabot ni Major Francisco Garello Jr. ang Spokesperson sa 4ID nga ang mga nakalas ang kinabuhi padayon pa nga giila karon panahona ug first batch pa lamang ang nahidangat sa 37 ka mga sundalo nga namatay gumikan sa pagkahagsa C-130 military plane didto sa Patikul, Sulu.

Dugang ni Garello nga makuha sa mga sundalo ang ilang mga benepisyo samtang tabang ug suporta ihatag ngadto sa mga nabiyaang pamilya.

“Nagbigay ng financial assistance si 4ID Commander Major General Romeo Brawner Jr., Rest assured na as a soldier ay meron talagang matatanggap na benipisyo ang mga sundalo, SOP na po iyan may proseso po tayo diyan na pag may Killed in action o wounded in action may matatanggap in accordance with our policy,” matud ni Garello sa NM Daily Source.

Gipaabot sab niini Garello nga ang mga sundalo sa 4ID walay ni-give up ug pabiling nagmalig-on taliwala sa dili tiaw nga trahedya nga nahitabo. Daan na usab ilang gipanumpaan nga ibuhis ang ilang kaugalingon alang sa nasud.

“Nung pumasok tayo, alam natin na kaakibat nito ay panganib. Ang isa na nga naming paa ay nasa hukay na. At bago namin pinasok ito mayroon tayong mandato na sumumpa tayo na i-aalay ang ating buhay para sa ating bayan, lahat ng prinsipyo ng ating pagiging sundalo,” panapos ni Garello.

Laumang sa mosunod nga mga adlaw kon matapos ang identipikasyon sa mga patayng lawas aduna na usab laing batch sa mga sundalo nga modangat sa Cagayan de Oro ug laing military honor ang ihatag gihapon sa pwersa sa 4ID ug uban pa nga division nga modawat kanila.

(photo steph berganio/nmds)

MisOr, CdeO motabang sa biktima sa C-130 plane crash

10 Jul, 2021, No comments

By Chyrel Macale-Cariaga

MOPADANGAT og tabang ang kagamhanan sa Misamis Oriental lakip ang lokal nga kagamhanan sa Cagayan de Oro sa pamilya sa mga sundalo nga nakalingkawas ug nakalas ang kinabuhi gumikan sa pagkahagsa sa ilang gisakyan nga C130 military plane kagahapong adlawa sa Patikul Sulu.

Atol sa virtual flagraising ceremony kaganina sa buntag gipaabot ni Governor Bambi Emano ang iyang dakong pahasubo ngadto sa mga pamilyang nawad-an ug mipadangat sa iyang pag-ampo sa paspas nga pagkarekover sa mga nakalingkawas.

Gipaabot niini nga iya na nga gikontak ang mga personahe sa militar aron makuha ang mga pangalan sa mga taga Misamis Oriental nga mga biktima aron mapadangat ang gipreparar nga tabang alang sa ilang tagsa-tagsa ka pamilya.

Atol sab sa City Hall Daily Press Briefing gipahibalo ni Cagayan de Oro City Mayor nga andam siya nga motabang sa mga biktima sa dili tiaw nga trahedya.

Sa iyang bahin ni Major General Romeo Brawner Jr. ang bag-ohay lang milingkod isip Commander sa 4th Infantry Division Philippine Army kaganina sa change of command nipadangat sa iyang dakong kasubo sa gidangatan sa mga sundalo.

Gipaabot sab niini nga bisan paman wala nahitabo ang pagkahagsa sa military plane gikatakda nga moabot ang mga bag-ong aircraft alang sa kasundalohan samtang moderno nga mga kagamitan sulod sa balay tambalanan sa mga sundalo ang moabotay.

Ang nasangpit nga eroplano adunay 96 ka mga sakay ug sa uwahing ihap misaka na sa 50 ang nakabsan sa kinabuhi kon diin 47 niini mga sundalo, tulo ang sibilyan nga nahagsaan niadtong higayon samtang nagtrabaho sa quarry sa dapit.

adunay 53 ang samaran nga padayong gitambalan sa nagkadaiyang balay tambalanan nga gikatakdang bisitahon ni Presidente Rodrigo Duterte human gikasubo niiin og dako ang gidangatan sa pwersa sa mga sundalo.

photo courtesy MisOr PIO and CIO

MisOr, CdeO motabang sa biktima sa C-130 plane crash

10 Jul, 2021, No comments

By Chyrel Macale-Cariaga

Atol sab sa City Hall Daily Press Briefing gipahibalo ni Cagayan de Oro City Mayor nga andam siya nga motabang sa mga biktima sa dili tiaw nga trahedya.

photo courtesy MisOr PIO and CIO

Recent Posts