ALAS 12:16 sa kaudtohon adlawng Martes, Nobiyembre 24, 2020 nadawat sa buhatan sa Bureau of Fire Protection (BFP) ang alarma sa kalayo hinungdan paspas nga girespondihan sa kabomberohan ang sunog nga miulbo diha sa Little Cebu, Mambato, Barangay Lapasan, siyudad sa Cagayan de Oro. 

Gibutyag ni Fire Superintendent  Allan Cabot sa nga gipaabot nila sa third alarm mga alas 12:25 human nakita nga congested ang area ug gumikan sab sa kapiot niini ila na lamang gisumpay-sumpay ang napulo ka hose aron lamang maabot sa tubig ug mapalong ang kalayo nga mikaylap na sa kasikbit nga kabalayan. 

Mga alas 1:15 sa hapon gideklarar kining fire out  apan nagbilin og P175,000 nga structural damage, walay labot niini ang mga kabtangan sa mga nasunogan. Lima ka mga balay ang totally damaged ug duha ang partially damaged. 

Matud ni Fire Supirentendent Cabot nga ang kalayo nagsugod sa giparentahan nga balay ni Inday Podalan ug basi sa ilang nakuha nga report nga nagsilaab ang sunog sa kwarto nga girentahan sa usa ka Bryan. Giingong ang lawak niini nakonektar sa giingong nag flying og kuryente sa maong balay.

Hinuon kining tanan ubos pa sa imbestigasyon sa kabomberohan labina gyud ang giingong  hinungdan sa pag-ulbo sa kalayo nga unang gikareport nga gumikan sa electrical overloading ug giingong kagahapong adlawa pa namatikdan nga gasila.