Brgy. G. Pelaez sa Gitagum natugaw sa engkwentro sa NPA ug kapulisan
November 26, 2020 at 7:53 pm,
No comments
By Steph Berganio
ADLAWNG Dominggo, Nobiyembre 22, 2020 natugaw ang malinawon nga Barangay sa G. Pelaez, lungsod sa Gitagum, Misamis Oriental human ang panag-engkwentro ug pagbinayloay og bala tali sa New People's Army (NPA) ug kapulisan.
Gumikan niini paspas nga mihikling ang kapin gatusan ka pamilya kon liboan ka mga indibidwal ug nagpasilong sa mga tunghaan nga nagsilbi nilang evacuation center sama sa
Cogon Elementary School, Ulab Elementary School, CP-Garcia Elementary School og Talao Elementary School.
Atol sa panag-engkwentro usa ka sakop sa kapulisan nga mao si PSSg. Darwin Rey Juario Dandasan, 34 anyos nga taga El Salvador City ang nasamdan.
Dungan niin namatikdan nga aduna sab walhong grupo ang nasamdan sa engkwentro nga pugsanong giguyod sa ilang mga kauban.
Nagpadayon ang pwersa sa 2nd Provincial Mobile Force Company (PMFC), Gitagum Police Station, Libertad Police Station sa clearing operation niadtong Nobiyembre 24 sa dapit ug sa encounter site mismo narekober ang patay lawas sa wala pa mailang sakop sa NPA nga samdan sa iyang ulo walang bahin sa lawas.
Gibutyag ni PLtCol. Leopoldo Recimilla, kinsa maoy Commanding officer sa 2nd Provincial Mobile Force Company (PMFC) nga mahimo na nga makabalik ang mga residente sa ilang puloy-anan.
Gani si G.Pelaez Kapitan Jeofrey Tagarda nahimong emosyonal human nabalaka sa iyang mga residente apan mapasalamaton nga sa tinabanga sa uban barangay ug LGU sa lungsod naplastar ang iyang mga sakop sa mga evacuation center.
Lakip ang Provincial Government sa Misamis ubos ni MisOr Governor Bambi Emano nagpadangat og tabang pinaagi sa paghatag og mga food packs alang sa mga bakwit nga walay nabitbit nga pagkaon dihang nanghikling.
Nasayran nga 20 ka tuig na ang nilabay nga adunay panag engkwentro sa NPA ug mga kapulisan sa maong barangay ug wala gidahom sa mga residente sa dapit nga mautro ang panag engkwentro karong tuiga.
Niadtong Nobiyembre 20, una nga namatikdan ang presensya sa pipila ka mga miyembro sa walhong grupo nga anaa nagtukaw sa lugar sa Barangay G-Pelaez nga
sunod sab dayon nga namatikdan sa adlaw nga Sabado, Nobiyembre 21 sa Purok 8, Sitio Sikiton sa alas 7, alas 10 og alas 11 sa kabuntagon ug niadtong adlaw nga Domingo, Nobiyembre 22 ang adlaw natigayon ang panag-engkwentro.
Giingong ang presensya sa NPA sa dapit tumong ang pagpangrecruit sa bag-ong miyembro.
Photo Courtesy MisOr PPO