Maslog gi-endorso pagka-mayor ang kanhi kaatbang sa 2016 election
January 20, 2021 at 8:43 am,
No comments
Gibutyag ni Talisayan Mayor Rommel Maslog nga si Rico Taray maoy iyang nakita nga angayan mahimong Mayor hulip kaniya sa lungsod labina karon katapusan na niya nga termino.
Nasayod si Mayor Maslog nga daghan Talisaynon labina iyang mga supporter nga moreak niini hilabina iya kining kusog nga kaatbang niadtong 2016 election.
Sa interbyu sa NM Daily Source iyang gipasabot ang rason nganong kini iyang napili gumikan aduna kini igong kapasidad nga modumala sa lungsod ug bout niyang ihatag ang higayon sa usa gyod ka lungsoranon ug Talisaynon.
"Ako man gud dili gyud ko gadumot. Wala na sab koy pamatud-an pa kay sa sige nako papili dinhi sa lungsod wala man ako napilde. Akong gahuna-hunaon pirme ang ihulip sa angayan sa posisyon aron makatabang sa katawhan. Sa wala pa sab mi nagkontra sa eleksyon ug konsehal pa siya labihan kami ka soud nga higala ug wala kana nawala sa akoa nga panaghigalaay hangtod karon," matud ni Mayor Maslog.
Gikumpirmar sab niini nga wala si Rico midoul kaniya apan siya ang nagpili nga bout niyang eendorso nga maoy mahimong Mayor aron magkahiusa og balik ang mga naguba nga pamilya ug masuwayan sab sa mga bag-ong henerasyon ang liderato sa usa ka lumad nga Talisaynon.
Dugang ni Mayor Maslog nga adunay pipila nga unta maoy iyang nakita nga hulip niya apan iyang nakita nga imbes maoy nakaposisyon maoy galisod lisod sa mga yanong lungsoranon.
Gikumpirmar sab niini nga siya ang magpapili pagka bise-mayor sa lungsod.
Hinoun layo pa ang eleksyon ug daghan pa ang posibleng mahitabo hinungdan sa pagkakaron nakapokos usa si Maslog sa pagserbisyo sa katawhan ug pakigbatok niining pandemya. |svb
