Paglunsad sa MisOr Agricultural Devt. Complex miani og daghang suporta
HUMAN sa kalamposan sa paglunsad sa pito ka ektarya nga Misamis Oriental Agricultural Development Complex miani kini og suporta gikan sa pribado ug publikong ahensya nga suportahan kini sa umaabot.
Ang pagbukas niini gipangunahan mismo ni Governor Bambi Emano ug Provincial Agriculture Office Head Apollo Pacamalan kon hain ubay-ubay sab ka mga dagkong opisyal sa nagkalain laing buhatan sa gobyerno ang mitambong.
Kinasing-kasing nga mapasalamaton si Governor Emano labina gyod sa kadagkoan sa Phillip Morris Fortune Tobacco Corporation (PMFTC Inc.) sa pagdonar ug pagtugot nga gamiton ang tanan kabtangan pinaagi sa ilang gikasabotan ug gipirmahan nga deed of usufructuary. Mas gipili sa kompanya nga ipagamit ug idonar kini sa lalawigan aron mas molambo pa ang sektor sa agrikultura sa probinsya.
Ang dako nga kalihokan gisugdan sa usa ka santos nga misa ug blessing, usa ka programa kon asa ang mga nagkalain laing opisyales sa dagkong ahensya mihatag sa ilang message of support nga gisundan sa signing of pledge of support.
Nagpadangat sab sa iyang dako nga pahalipay si Senator Cynthia Villar ug mipasalig nga mosuporta. Gidayeg sab niini ang Administrasyon ni Emano gumikan sa pagpalambo niini sa natad sa Agrikultura sa nasod.
Anaa usab ang presensya ni Gingoog City Vice Mayor Peter Unabia nga nagkomit sa iyang suporta niining agricultural complex kay matud niini dili kini molampos kung walay suporta gikan mismo sa nagkalain-laing ahensya sa gobyerno.
Lakip sa mipirma agi og suporta ang buhatan sa Department of Tourism, 58th Infantry Battalion sa Philippine Army; DOST-10, Philippine Coconut Authority; Coco Technologies Corporation, DAR-10, Department of Agriculture; PhilFarms Inc., local Government Unit sa Claveria, 1st District Congressman Christian Unabia ug uban pang pribado nga indibidwal.
Dungan sa paglunsad sa Agricultural Development Complex ang turn-over sa tseke ngadto sa Linabo Multi Purpose Cooperative for Organic Certification, pagtunol sa coconut planting materials ug gisundan sa ribbon cutting sa Macapuno Embryo Culture Facility kon asa dinhi iproseso ang macapuno nga lubi ug mahimong prudokto sama sa makapuno candy, ice cream ug uban pa.
Nangulo sab si PAGRO Head sa paglibot suroy sa halapad ug luag nga Greenhouses ug mga processing plants.
Sa pagbukas sa Agricultural Development Complex natuman na ang pangandoy ni Emano nga sa umaabot mahimong sentro sa agrikultura ang lalawigan ug mahatagan og daghang oportunidad nga mokita ang daghang mag-uuma.
Photos by svb|nmds