SAF 44 gihandom sa PRO-10
GIHANDOM sa Police Regional Office 10 sa pagpanguna ni Regional Director, Police Brigidier General Rolando B. Anduyan ang pagkamatay ug pagkabayani sa 44 ka miyembro sa Special Action Force o SAF 44.
Karong adlawa Enero 25, 2021 gitawag kining Day of National Remembrance of SAF 44.
Ang komemorasyon gipahigayon atol sa Flag Raising and Awarding Ceremony sa Regional Headquarters Parade Ground sa Camp 1Lt Vicente G Alagar, Lapasan siyudad sa Cagayan de Oro.
Gihandom sa PRO 10 ang kaisog ug kabayani sa 44 ka Special Action Force (SAF) commandos nga namatay sa doguon nga engkwentro sa Mamasapano, Maguindanao samtang sila nagpahigayon og anti-terrorism operation unom na ka tuig ang milabay.
Si PBGen. Anduyan uban ang Command Group naghatag og tribute pinaagi sa pagpalupad og puti nga balon simbolo sa ilang pag-ampo nga magmalinawon ang mga kalag sa nangamatay nga miyembro sa SAF.
Ang seremonya gisundan dayon og awarding sa mga deserving Regional Recruitment and Selection Unit 10 ug paghatag og Plaque of Appreciation sa Regional Chief, Regional Intelligence Division 10 human nahimong Top 3 sa Directorate for Intelligence, Unit Performance Evaluation Rating ug Top 1 sa Individual Commanders Evaluation Rating.
Aduna sab gipahigayon nga santos nga Misa sulod sa St Ignatius de Loyola Chapel sulod sa kampo kon asa nakasab-it ang dako nga tarpulin sa 44 ka mga SAF nga mipanaw.
