Dul-an 100,000 ka displaced workers sa Region 10 natabangan sa TUPAD sa DOLE-10
By Steph Berganio
MOABOT sa 98, 134 na ka mga displaced workers o mga trabahante sa tibouk Northern Mindanao nga nawad-an sa trabaho gumikan apektado sa Covid-19 ang natabangan sa Department of Labor and Employment (DOLE-10) pinaagi sa programang Tulong Tulong Panghanapbuhay sa Ating Disadvantaged/Displaced Workers.
Usa kini ka community-based package nga tabang nga mohatag og dinalian nga trabaho alang sa mga displaced workers, underemployed ug seasonal workers kon diin ila kining trabahoan sulod sa napulo ka adlaw.
Matud ni DOLE-10 Regional Director Albert Gutib nga sa kinatibuk-an moabot na usab sa P164 milyon ang napagawas nga pundo alang ning maong programa.
Ang mga Local Government Units, lakip
mga Civil Society ang mahimong moaplay
sa programa aron maka-avail niini ug maoy mo initiate sa pagpaabot sa programa
alang sa mga apektado.
Gitarget karon sa DOLE-10 nga maasistahan ang mga mga pamilya sa mga trabahante nga naapektuhan sa bagyong Odette.
"We are expecting funds to be downloaded for the families and informal sectors affected by typhoon Odette," pahayag ni RD Gutib.
Aron kwalipikado niini nga programa gikinahanglan lamang nga moduol sa lokal buhatan sa DOLE-10 o PESO nga makita sa matag munisipyo.
Magdala lamang og pamatoud nga apektado sa bag-ohay lang mihapak nga bagyo ug lakip sa i-comply ang rekisitos nga trabahoan kini og napulo ka adlaw kon diin upat ka oras lamang sa usa ka adlaw.
Sa laing bahin padayon sab ang kampanya sa DOLE-10 sa mga trabahante nga magpabakuna aron dili mahasol sa ilang pagpanarbaho.
"Kita mga trabahante, magpa-vaccine nata kay naay balaod karon nga nag-ingon nga dili ta pwede makasulod sa atong mga workplace kung walay vaccination," kini ang pahayag ni Atheneus Vasallo kinsa Technical Support Services Division Director II sa DOLE-10.
Dungan niini iyang gipaabot nga kung adunay mga trabahante nga mibarog nga dili magpabakuna apan nagresign kwalipikado kini kaayo sila nga makadawat sa programang TUPAD.
"I believe that they are considered displaced workers unfortunately and very much qualified for TUPAD," pahayag ni TSSD Vasallo.