FITS ORIENTATION SA CAMIGUIN
BISAN paman nga gitukod na sa probinsya ang Farmers' Information and Technology Services (FITS) center niadtong 2007, ang probinsyal nga pangagamhanan nakita gihapon ang panginahanglanon sa pagpausbaw sa pagkuha'g datos sa agrikultura, ug tungod ani, gipahigayon ang FITS orientation, Pebrero 3, sa Provincial Agriculture Office (PAO) Conference Hall.
Gibutyag ni Sangguniang Panlalawigan (SP) Member Louis Bollozos, kinsa usab ang committee chair sa agrikultura nga ilang gi-download ang trabaho sa barangay nga wala sila gipahibalk ug nakurat nalang matud pa nga niabot lang kini kanila.
Iya usab gidungag nga importante ang FITS, labi na sa pagpagtimbang-timbang sa sitwasyon sa agrikultura sa usa ka lugar apil na usab ang pagpausbaw sa mga interbensyon ug serbisyo nga haum sa sektor.
Kini, human usab nakita nga daghan kalainan sa mga report nga gaihatag sa SP gikan sa mga munisipyo.
Sa iyang bahin, si Cresencio Loquellano, OIC supervising agriculturist, miingon nga tungod sa FITS, mas matinud-anon na ang datos ug ang probinsya dili na usab maulaw sa paghatag sa mga report ngadto sa Department of Agriculture (DA)-10 ug sa uban pang hingtungdan.
Anaa sa 26 nga mga partisipante gikan sa lima ka munisipyo sa probinsya ang mitambong sa kalihukan. Sila gitudluan sa "features" sa sistema ug sa pagpaandar niini, ug naka-hands on training ug workshop usab sila.
Ang FITS usa ka pasilidad nga gahatag og serbisyo sa impormasyon ug teknolohiya nga tumong makapauswag sa akses sa impormasyon ug teknolohiya sa agrikultura ug kahinguhaan sa mga mag-uuma, mamaligyaay, negosyante, ug uban pang hingtungdan.
Gatubag usab kini sa panginahanglanon sa mga kliyente pinaagi sa usa ka technology clinic, pagbansay-bansay, "caravans," pagbaligya sa mga suplay sa pagtanom, "linking," ug pagpalambo sa negosyo