4ID NAGBANGUTAN SA PAGKAMATAY SA LIMA KA SUNDALO
NAKA HALF MAST ang bandila karon sulod sa kampo sa 4th Infantry Division-Philippine Army human sa kamatayon sa lima ka mga sundalo kon hain usa niini nag-amok ug gipamatay iyang mga kauban diha sa Service Support Battalion sulod sa Camp Evangelista, Brgy. Patag Cagayan de Oro City.
Adlawng Lunes Pebrero 13 tuig 2023 mibisita mismo ang kanhi 4ID Commander karon Commanding General sa Philippine Army nga mao si Lt. Gen. Romeo S. Brawner.
Giubanan kini mismo ni 4ID Commander, Maj. Gen. Wilbur C. Mamawag sa haya sa upat ka mga namatay nga sundalo nga gipahigayon sulod sa 4ID gymanasium lakip pagbisita sa usa ka samaran nga anaa karon gimonitor sulos sa Camp Evangelista Station Hospital (CESH).
Ang suspek sa pagpatay wala gisagol sa upat apan anaa karon sa mortuary sa 4ID.
Personal nga gipaabot ni Lt.Gen. Brawner ang iyang labihang pahasubo ngadto sa pamilya ug gipasalig nga mohatag og financial assistance.
Gipasalig sab niini sa pamilya nga ihatag ang tanang panginahanglan lakip ang mga benepisyo ug ilang mga madawatan. Tuyo usab sa maong pagbisita nga mabayaw ang ilang moral.
Human sa vigil sulod sa kampo dalahon na sa ilang tagsa tagsa ka pamilya ang mga patayng lawas sa mga sundalo ug hatagan sa military honors.
Una na nga mitunol og assistance si
4ID Commander Major General Wilbur Mamawag lakip ang pagtukod og Board of Inquiry (BOI) Team aron maoy mokolaborate sa Cagayan de Oro City Police Office.