MisOr potensyal nga diving spot sa Pilipinas
SA tinguha sa Department of Tourism (DOT-10) nga ang kadagatan sa Misamis Oriental mabutang sa mapa isip iladong diving spots sa nasud sa Pilipinas.
Labaw sa tanan aron mapatas-an ang kasayuran sa katawhan kalabot sa hiyas nga makita ilawom sa kadagatan.
Ang DOT-10 naglusad og Dive Tourism special project sa Misamis Oriental kon diin ang dive explorations gipahigayon sa lungsod sa Medina, Talisayan, Balingoan, ug siyidad sa Gingoog.
Kaabag sa proyekto ang Gingoog Bay Alliance, Local nga kagamhanan sa Balingoan, ang Bureau of Fisheries and Aquatic Resources - Region 10 (BFAR 10), ug DOT accredited dive resorts sama sa Mantangale Alibuag Dive Resort ug Duka Bay Resort uban ang local dive photographers nga si Benj Allera ug Jo Nathaniel Yasay.
Ang dive exploration gipangunahan mismo ni DOT Regional Director Marie Elaine Unchuan ug atol mismo sa exploration nakita ang nagkalain-laing species sa colorful reef fish, sea slugs, corals ug lakip pa ang endangered Hawksbill Turtle.
Kining tanan nagpamatoud nga abunda ug potensyal nga dive spots ang lalawigan ug mahimong tourism destinations.
Ang DOT 10 nagtinguha sab nga malakip sa dive map ang probinsya nga mapromotar isip dive destination dili lang dinhi sa rehiyon apan national ug international dive expos sama sa Philippine International Dive Expo (PhiDEx) nga sa labing unang higayon gitakdang ipahigayon sa online.
Gumikan sa kalamboan sa dive tourism sa lugar ang DOT nagsugyot og nagkalain laing training ug programa aron mapalambo pa ang kapasidad sa mga local dive operators, mangingisda ug tibouk komunidad.
Gibutyag ni RD Unchuan nga tulo ka tuig na nga ilang gipalambo ang Dive Tourism sa Rehiyon kon diin ang unang area nga gilusad kini didto sa probinsya sa Camiguin ug ikaduha sa lalawigan sa Misamis Occidental. "Now we are looking at Misamis Oriental. Because MisOr is composed of coastal towns, we see that there are so many potential dive sites here. After the dive exploration, we were impressed with what the Misamis Oriental coastline has to offer. We will be diving and exploring more sites within the next couple of months," matud ni Unchuan.
Gipaabot sab niini nga ang Dive Tourism dako og ikatabang nga magbukas og oportunidad alang sa panginabuhian ug makatabang nga mapreserbar ang mga hiyas ug kinabuhi ilawom sa kadagatan.
Ang Dive Misamis Oriental ang pormal nga ilusad karon umaabot Enero 2021 dungan sa Kuyamis Festival sa kagamhanan sa Misamis Oriental uban ang DOT-10. 
Photos courtesy of DOT 10, Benj Allera, Jo Nataniel Yasay, and Magtangale Alibuag Dive Resort.