Cafe sa Bukid bida ang exotic foods ug perfect mountain views
WALA gidahom ni Perlin Antonette Cabiladas nga ang ilang lugar nga bukid nga kaniadto wala gyod halos makaila ang karon gadumogon na sa mga daghang turista, nature lovers ug mga mahilig sa roadtrip ug labaw sa tanan food trips.
Mapasalamaton si Pearl kay dako kaayo og tabang ang social media gumikan sa kalapad sa coverage niini, kadaghan sa katawhan nga maabot nganong naila og maayo ang ilang gipanag-iyahan nga Cafe sa Bukid nga nahimutang sa Barangay Kibangay, lungsod sa Lantapan, Bukidnon
Isip migradwar sa Business Entrepreneurship sa usa ka prestihiyosong tunghaan sa Manila iyang gisugdan ang pagama og Cassava Chips nga maoy iyang gipasa nga requirement sa tunghaan nga sila ipagama og kaugalingong business plan.
"Before pa nagstart ang cafe sa bukid, naa nami products daan mao ning cassava chips kay business plan nako ni way back college ko. Pag graduate nako nag work ko og two years then nag stop ug akong gi-focus ang cassava chips," matud niini.
Tumong lang unta niya nga mahimo kining pasalubong center hilabina nga ang iyang igsuong si Francois nagsugod usab sa pagpanghimo og mga strawberry jam, pineapple jam ug uban pang produkto nga gikan mismo sa ilang umahan sa strawberry.
Dinhi nagsugod na usab sila og luto og mga putahe nga gapangunay mismo sa kusina ang iyang igsuon kung diin silang duha apil iyang hinigugma nga si Raymund Vallente ang maoy nagpokos niini nga business.
Sa una gikahadlokan niini nga basin maghinay ilang negosyo gumikan sa pagbuto sa pandemya apan adunay positibo nga nahimo si Covid-19 pandemic gumikan ang katawhan gusto magpabukid ug ilang na-appreciate og maayo ang kaanindot sa dapit.
EXOTIC FOODS
"Daghan pami og menu nga idevelop sama sa Adlai gikan sa Talandig Community, atong pako gikan sa lasang ang wild mushroom soup nga lokal product since ang Kibangay giila nga vegetable basket sa Lantapan so mag-offer pod mi og vegetable salad ug ang native nga baki amo ning buhion," butyag niini.
Usa ka conference area nga pwede ireserved ang mga parties sama sa birthdays, wedding ug uban pa ang ilang kasamtangan gitukod nga siyempre mag-atubang gihapon sa nindot ug tsada nga view. Sa mga plantita nga feel magtsika pwede sab sa ilang garden.
Gipasabot ni Pearl ang rason nganong kinahanglan nga huboun ang mga sapatos ug tsinelas aron ang mga mobisita 'feel at home"
Sa kasikat sa Cafe sa Bukid karon panahona naghatag sab kini og panginabuhian sa mga residente sa dapit gumikan ang mga local products sa dapit, gipadisplay ni Pearl sa ilang cafe.
"Ang atong mga trabahante dinhi kasagaran gyod mga taga Kibangay lang gyod. Naa pod tay mga estudyante nga atong gisuportahan sa ilang bamboo straw nga gigamit namo sa among mga cold drinks so mga estudyante ang gahimo ana and then ang mga out of school youth nga mga boys nga maoy mokuha sa mga materials. Aside sa mga crew diri pag-abot sa production naa tay mga nanay, mga batan-on," sey pa niini.
Gawas nga imong maenjoy ang perfect view ug bugnaw nga dapit sa kaudtohon dili sab kamahayan ang ilang mga lami nga mga pagkaon.
Gihangyo lang niini ang katawhan nga mobisita nga samtang wala pa natapos ang pandemya kinahanglan lamang nga sundon ang tanang gabayan sa pakigbatok sa Covid-19.
